0:00

قبل كم يوم شفت رييل على الانستاكرام بي واحد شيكول، هل تعلم انه اذا كان اكلك صحي، وتمرنت كل يوم، و أخذت كفايتك من النوم و شربت الكثير من الماء، فإنك ستموت ايضاً، من سمعت هذا الحجي، ضحكت و كلت اكيد محد يفكر بهالطريقة، بس من فتت للتعليقات الي عالريل، انصدمت بكمية الناس الي مقتنعة بهذا الحجي و ماخذته على محمل الجد، رحت دورت عن ناس حاجين بهذا الموضوع و للاسف ملكيت، فقررت اني احجي بي، منو اني!؟ وياكم فلان و هاي الصوتية الثانية من عراقي بودكاست الموسم الثالث…وحدة من الاشياء الي من و اني صغير جنت مهتم بيها هي الرياضة، بس المدرسة الي اني بيها كل حصة رياضة يخلونا ننظف الساحه من الفضلات الموجودة هناك، و من تكون الساحة نظيفة جان مدرس الرياضة يشمرلنا طوبة نركض وراها، وحتى مجان مهتم يسويلنا احماءات مثلا او يقسمنا فريقين او ٣ افرقة فجان الموضوع دائما بإيد الطلاب الي يلعبون كره قدم زين و همه يحددون القوانين، و طبعا ابد ما جانت القوانين الها علاقة بكرة القدم، بس على العموم، جان الصف تكدر تقسمه ل٣ افرقة، و جان دائما اكو فريق كلش قوي و تحسة مانشستر يونايتد مقارنة بالافرقة الثانية، لان كل الي يعرفون يلعبوها بالشارع جانو يروحون لنفس الفريق و يبهذلون الافرقة الثانية، و طبعا جنت اتمنى اكدر العب مثلهم لان كلش احب كرة القدم و طبعا جنت اتابع كأس العالم، و انتظره يجي لان جانت الاجواء و الاغاني و المباريات الحماسية و كل الدنيا دتتفرج وياك حتى الي ميتفرجون طوبة، فاحساس حلو، دقيقة اني ليش دا اوصف الاحساس، احنا حاليا بفترة كأس العالم الي ديصير لاول مره بدولة عربية، الي هوه جنه نحلم العرب يصعدون لكاس العالم و هسه دنعيش كأس عالم صناعة عربية ميه بالميه، المهم نرجع لايام المدرسة، بعد فترة طلبت من اهلي اسجل بنادي مال كراتيه، و بالفعل رحت سجلت بالنادي و جان هذا الشي اوقع ب٢٠٠٦، ما متأكد الصراحة، لان اتذكر وراها بفتره صار كأس اسيا الي فاز بي منتخب عراق و مشفتنه منه شي وراها للاسف، المهم اني هيج قدرت التوقيت، اتذكر اول يوم رحت شفت مكان كل الي بي لابسين بدلات كراتيه بيضه و الوان مختلفة من الاحزمة الي مجنت فاهم معناها بس جنت ادري انها ترتيب المستويات، المهم بديت هناك و عجبتني الرياضة نوعا ما، بس جانت رياضة دفاعية نوعا ما و ممتعلم بيها الحركات الي تشوفها بالافلام و الموضوع ياخد وقت هواي و حصص هواي حتى تكدر تتسلق الدرج مال الحزمة الي جان ابيض اصفر اخضر ازرق بني اسود و بعدين الاسود يصير درجات و اتوقع البني هم بي درجات، و احتاجيت تقريبا اربع شهور لحد ما وصلت للحزام الازرق الي هوه اخر واحد اخذته، و طبعا اذا تتفرج مسلسل كوبرا كاي راح تعرف تفهم ان المسلسل مو واقعي من ناحية المدة الي يحتاجها الشخص حتى يكون محترف، بالمسلسل اليوم الولد سجل بالنادي اخر الاسبوع صار اقوى واحد بالفريق، و طبعا هذا الشي جدا مو واقعي بس المسلسل حلو و انصحكم تشوفوه، اتذكر باخر فتره بهذا النادي نظموا بطولة بالنادي و شاركت بيها و طبعا مثل ما جان متوقع اخذت الذهبية، لا طبعا مجنت متوقع و مجنت حتى فاهم نظام البطولة، لدرجة اني جنت اوكف و من يجي وقت مباراتي اروح العبها بس مجنت اعرف اني شنو المباراة الي دا العبها، هي هي النهائية لو النص نهائية لو شنو، بس جنت اروح العب اغلب و اطلع، لحد ما بالاخير فزت بلعبة و جان ينطوني المدالية و اني كلشي ما مفتهم ههههههههههههههه، المهم بعد هاي البطولة عفت النادي ماعرف ليش، و قررت و انتقطعت عن الرياضة لفتره سنة تقريبا، بعدين ماعرف شنو جاب ببالي و رحت دخلت نادي كونغ فو… لحد يسألني شمعنه بس جانت رياضة كلش حلوة كلش استمتعت بيها اكثر من الكراتيه و كلش حبيتها، بس طبعا ما فهمت ترتيب الاحزمه بيها و مجنت كلش مهتم بالموضوع بس جنت حاب اللعبة نفسها و شلون واحد يمارسها. بعد فترة عفت الكونغ فو و رحت سجلت بجيم مال حديد و هاي جانت اول مره اسجل بالجيم و جنت كلش ما فاهم و منين ابدأ المدرب جان كلشي ميشرح و جان اول ما اطب يكلي روح العب على هاي الخمس اجهزة و روح، فجان الموضوع جدا ممل و مكدرت استمر بي، بس اني اكلك، جان بذرة زرعتها بعضلاتي، لان بعدين اكتشفت انو العظلات الها ذاكرة و كل ما ترجع تتمرن بالمستقبل عضلاتك راح تتذكر الاوزان الي جنت تشيلها و التكنيك الي جنت تستعمله و راح ترجع تتشتغل بشكل مبهر، المهم عفت الجيم و رحت اتعلمت سباحة و كمت ادرب سباحة بالمسبح من جان عمري 16 تقريبا و متدرون شكد حلو الاحساس من يجيلك احد ميعرف يسبح و يطلع من عندك يعرف يسبح، تحس انك راح تنقذ هذا الشخص بيوم من الايام اذا انحط بموقف ممكن يغرق بي، و الصراحة بعد ما اتعلمت السباحة اكتشفت ان هاي المهارة لازم الكل يتعلمها، مو مهم شكد عمرك او عمرج و مو مهم اذا انت شخص رياضي او جسمك يسمح او ميسمح، المي يكدر يشيل كل الناس، حتى الاطفال الرضع تكدر تعلمهم سباحة، لذلك اذا انت متعرف تسبح حاول تتعلم باقرب فرصة، عمرك ما راح تندم على هذا القرار، و صحيح اني مشتغلت هواي بمجال التدريب و الانقاذ بس كمت كل ما التقي بشخص ميعرف يسبح احاول اعلمه و بكل فخر اني علمت هواي ناس سباحة و بدون مقابل و راح اعلم بعد ناس، لان هذا النوع من المعرفه لازم يوصل للكل مثل ما كلت.ايام الجامعة حاول هواي اني اسجل بالجيم مره ثانيه حتى ابني جسمي و اقوي، بس للاسف ميزانيتي و وقتي جان ميسمح و جنت كل ما اسجل وره فتره الغي لان يا ما اكدر اروح يا ما اكدر ادفع، بس بعدين من سافرت لدولة غربية، اكتشفت ان النادي الرياضي من اساسيات حياة الفرد الي لازم يمارسها مثل الاكل و الشرب و الدراسة و الشغل، انت هنا لازم تضيف لهاي الاشياء النادي، و الحلو اني المكان الي جنت عايش بي جان اشتراك الجيم كلش رخيص، يعني جان تقريبا عشر دولارات و الجيم عملاق و بي كلشي، حديد و كارديو و ملعب سله و ملاعب سكواش الي هي طبعا من الرياضات الي احبها و مسبح و جاكوزي و ساونا و كلشي تتخيله ممكن يكون بالنادي موجود و بسعر كلش رخيص، رحت فتره زينه لهذاك الجيم و خصوصا اني جنت ما اشتغل و دا انتظر تصريح العمل فجنت مكظيها جيم و بيت و تصوير، المهم بعد ما انتقلت من المكان الي جنت بي و رحت لغير مكان و اخذت تصريح العمل، انشغلت كلش و مجنت اكدر اروح للجيم فلغيت الاشتراك، و مراح احجيلكم كل مره سجلت بيها بالجيم لان هواي كلش و كل مره الغي وره فتره، بس هالمره اني قررت اني التزم بشكل كلش منظم و جدول صارم حتى اكدر اشوف نتائج و بالفعل بديت اشوف النتائج بس اتمنى استمر على هذا الرتم و ما اوقف مثل كل مره. و بنفس الوقت دا احاول اكل بشكل معتدل و ما اكل هواي و ما اكل دهون هواي او اتجنبها،طبعا اكو للاسف بمجتمعنا هواي ناس من يشوفوك تاكل بشكل صحي او بشكل معتدل و تسوي رياضة يستهتزون بيك، اذا جان من ناحية الرياضة يكولولك شلك بيها و تريد تراوي الناس عضلاتك و متوكل خبز و كلنا راح نموت منستفيد شي و اذا جان من ناحية الاكل الي من يشوفوك تتجنب الدهون الهواي الي موجودة بمعظم الاطباق العراقية او تحاول تقلل اكلك، يكولون عليك تتمضيك او يباوعون عليك بنظرة دونية و نظرة شفقة و هم يكلك احنه هيج هيج راح نموت، الي الصراحة على جهل الناس بصحتهم جان السبب بتدمير حياة ناس هواي، و امراض ما الها عدد، منها انسداد بالشرايين و ارتفاع نسبة الكولسترول بالدم و مرض السكري و غيرها من الامراض المزمنة و الامراض المميته، و اذا ما متت منها راح تعاني منها لفتره من حياتك، و وجهه نظري من ناحية موضوع انك هيج هيج ميت و ليش تهتم بصحتك، انك هنا دتختار طريقين لحياتك من وانت بشبابك و مراح تحس بتأثير هذا الاختيار غير لمن تكبر، اريدك تفكر بيها، و تختار واحد من هالخيارين، الخيار الاول انك تاكل الاكل الي تريدة و الاكل السريع و المضر بالصحة و الي كله دهون وكله دهن حر و ليه و حلويات سكرها زياد كلش و كميات كلش جبيرة من الاكل و تتونس بيها و متقرب للنادي ابد ولا حتى تمشي لراس الشارع او تسبح او تمارس اي نوع من الرياضة و اخر عشرين الى تلاثين سنة بحياتك تكظيها زيارات للدكتور و ادويه و نومه بالفراش و تصير عاله على الي حواليك و لازم احد يجيبك و يوديك و متكدر تصعد درجتين و متكدر تمشي خطوتين بحياتك و تعيش معتمد على الي حواليك، هذا غير مصاريف العلاج و بالاخير تموت و انت عشت اخر سنين حياتك بهذا الوضع، او الخيار الثاني الي انت تاكل بي اكل صحي او على الاقل اكل بكميات مناسبه و مو مبالغ بيها و تتحرك هواي و متكظي شبابك بالفراش نايم على التلفون و تكبر و تظل صحتك زينه و تكدر تروح و تجي وتصعد درج و تشتغل و تسافر و كلشي يعجبك تسوي تسوي و بالاخير تموت و انت مستمع باخر سنين حياتك. اريدك تسئل تفسك بربك شنو الي يخليك تختار الاختيار الاول مو الثاني؟ فكر…. اكو شخص حب يشارك تجربته ويه الناس بخصوص هذا الموضوع، يكول احنه نكدر نكون سعداء او نكون دنعاني و اكو مكونات للسعادة و للمعاناة اكثر من الصحة، بس الصحة مكون كلش جبير.نمط الحياة الغير الصحي ممكن يوصلك لقدر كبير من الألم وعدم الراحة. إذا انت صغير حاليا، يجوز متحس بهذا الشي، بس من تدخل للأربعينيات والخمسينيات من عمرك، راح تلحك بيك العادات السيئة. إذا جان بإمكانك الاختيار بين المعاناة لسنوات هواي بعدين تموت وبين عدم المعاناة لسنوات هواي بعدين تموت،شنو تختار؟ هيه مو مجرد مسئلة عدم معاناة و انما اني عشت بصحة سيئة و بصحة جيدة، و اكدر اكلك انك من متكون دتتعامل ويه مساكل صحية مستمرة، تنفتح حياتك بكل انواع الطرق الحلوة و الممتعة، يكول اني عمري ٥١ سنة، عشت نمط حياة غير صحي لمدة خمس عقود من حياتي و اكلت اسوء انواع الاكل السريع و المو صحي،و عمري ما مارست اي نوع رياضة، و استمريت لمدة ٤٥ سنة و مجان اكو شي مأثر علية و حالتي الصحية زينة، و حشيت نفسي بالبيتزا و الحلويات و غيرها، وجنت ادري انو عاداتي السيئة راح تموتني بالاخير، بس مجنت مفكر اني راح اعيش كشخص مريض لمدة ٣٠ او ٤٠ او ٥٠ سنه. بمنتصف الاربعينات من عمري كمت ما اكدر اسيطر على وزني، مع اني قبل جنت اكل كلشي اريد بدون ما يتأثر جسمي، كمت اذا امشي مسافة قصيرة احس راح يغمى عليه من التعب، لو اذا صعدت درجتين اهلك، و صرت تعبان طول الوقت، كام يصير بيه نزلات برد هواي و جنت ما انام زين و غير الحرقة الي احس بيها اذا اكل لقمه وحدة، و كعدت هواي من النوم بنص الليل مدا اكدر اتنفس و اكح بشكل غريب، ومع ذلك، ربما جان بإمكاني اعيش بهالشكل لفترة طويلة. و اكو تاريخ من طول العمر واعتلال الصحة بعائلتي. عاش ابوية لحد عمر ال 90 تقريبا، بس قضى اخر ٣٠ سنه من حياته بصحة كلش سيئة لان مجان مداير باله على نفسه. و نفس الشي ويه أجدادي الي سبقوه. بعد ما شفتهم و اقاربهم الثانيين ديعانون لسنوات، قررت اسوي تغيير. و قطعت السكر والملح والزيت. أصبحت نباتيا. و بدأت اتمرن. وخسرت ٣٠ كيلو. و أني حاليا بصحة جيدة. أنام طوال الليل. ميصير بيه نزلات برد. احس وكأنني بالعشرينات من عمري.طبعا ما اكدر اشوف المستقبل بس راح احاول اتعلم من هذا الحدث و من تجارب الناس الي حواليا.زين هسه انتو تكولوي شتريد من عدنه وره كل هالحجي، ، اني احب اكلك ماريد شي من عندك و انما انت بالمستقبل تريد هذا الشي من عندك، تريدك تنتبه على صحتك و على اكلك، مو لازم تسوي نظام غذائي ولا لازم تروح للنادي، بس حاول تنتبه على نوعية اكلك و على كمية اكلك، و كمية المي الي تشربها باليوم و صحتك النفسية تحافظ عليها قدر الامكان، و تتحرك من مكانك متبقى بفراشك طول اليوم و متكظي شبابك نايم، حاول تمشي شويه او على الاقل ممكن توكف سيارتك بعيده شويه عن المكان الي انت رايحله حتى تمشي شويه و صدكني من تبدأ تفكر بهاي الطريقة، راح تلكي مليون طريقة تحافظ بيها على صحتك و تبدع و تبتكر بممارسات الحياة الصحية، اني ما اكلك اني حياتي صحية ميه بالميه، بس دائما احاول الكي طريقة احافظ بيها على صحتي و دائما احاول اترك العادات السيئة مثل الفيب الي اتركها و ارجعلها و النركيله الي عفتها من سنه و نص و جنت مدخن شره قبلها و كلش حسيت بفرق بعد ما تركتها، و غيرها من العادات السيئة، و هسه صارلي فتره دا اروح للنادي و طبعا دا احس بالفرق اذا جان من ناحية بدنية او نفسيه، و بس يا صديقي، اتمنالك حياة طويلة و صحية و فريقك يفوز اذا دتتفرج كأس العالم. دمتم سالمين