नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे-----------------------------------🙏🙏 नमस्कार माहरा20.08.2022, बऻदॖरप्यथ (भाद्र) गटॖ पछॖ (कृष्ण पक्ष) नवम (नवमी) बटॖवार (शनिवार/शनिश्चरवार), श्री सप्तर्षि सम्वत 5098, नक्षत्र रोहि, राश वृष (चलान), ऋतु वऺहरात (वर्षा) (चलान)**********************त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव**********************महामऻरी नाश - मंत्रजयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते**********************बरादरन वॊन तीज़मालि ज़ि मऻजी म्यॆ छु बासान ज़ि कऺशिर्य बटॖ छि पनॖन्य किन्य कऺशीरि मंज़ पनॖन्य ख्वर ठींकॖरावनॖच कूशिश करान मगर कॆंह बद-द्यमाग आतंकवऻद्य छिनॖ यछ़ान तिमन कऻशिर्य बटन ब्यॆयि तऺथ्य कऺशीरि मंज़ बऺसिथ वुछन यिम बटॖ तिमव लचि टास दी दी तॖ ल्यकॖ-थॊकॖ कऺर्य कऺर्य कऺशीरि प्यठ च़ऺलरऻव्य अज़ त्यॆयत्रॖह वऺरी ब्रॊंह। मऻजी ॳस्य छि नॖ अज़ व्यच़ान कुनि ज़ि केंच़व कऻशिर्य मुसलमानव छि गामॖ कि कमि ताम अन्दॖ राथ सानि धार्मिक कृष्णॖ भगवान सॖन्ज़ि झांकी मंज़ शमूहलियत कऺरमॖच़। अमि ख्वतॖ हमाकतॖच कथ क्याह गछ़ि आसॖन्य सावि बापथ। अकि अन्दॖ छि तिम सानि समुदायक्यन ॳकिस ॳकिस नफ़रस मोतॖकिस ॴसस मंज़ सोज़ान रोज़ान दॊयिमि अन्दॖ छि सान्यन धार्मिक त्यौहारन मंज़ ति दखॖल- अन्दऻज़ी करनॖच जुर्रत करान रोज़ान। सानि बापथ छि यि स्यठाह शरमिहॖन्ज़ कथ म्यॆ बासान। ॳस्य छि नऻरॖ दिवान बडि बडि हिन्दू मुस्लिम भाई भाई तिम छि क्रकॖ दिवान थदि थदि ज़ि प्रथ कांह गऻर-मुस्लिम छु कऻफिर। मगर तिहॖन्दिस वनॖनस छि ॳस्य शायद पनॖनि ख्वदगर्ज़ी मूजूब कनॖ-डोल दिवान रोज़ान। यीत्य ति सऻन्य टऻठ्य वुन्युखताम तिहॖन्ज़न गोल्डन ह्यन्द्य शिकार बनेयि अकि फिरि ति छुनॖ कऻशुर मुसलमान पनॖनि गरि न्यबर द्रामुत तॖ विरोध कॊरमुत बऺल्कि तत्युक मुसलमान छु आतंकवाद्यन पंनाह दिथ पनॖन्यन गरन मंज़ बिहिथ। सोन वदुन तॖ रिवुन वुछिथ छि तिम ॳन्दॖरय ॳनहदॖर्य ख्वश गछ़ान तॖ मगरमछॖ सॖन्द्य पऻठ्य अपज़ुय ऒश हारान तॖ बटस बऻज़्य तारान। खऻर व्यथ रोज़ि पकवॖन्य, ॳस्य रूद्य छ़्वकॖवॖन्य तॖ रोज़व पनॖन्य व्यथा वनवॖन्य। कथ छि जऻरी **********************कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव**********************नऺविव तॖ फॊलिवभूषण कौल "दीप" (बूज़िव ॳज़्युक सबक़ म्यानि ज़्यॆवि ति)(यि सबक़ वुछिव podcast दऺस्य ति)https://anchor.fm/bldeep(यि सबक़ वुछिव koshursabak.blogspot.com प्यठॖ ति)