Kruoslovys nūvods attīceibā pret golvyspiļsātu ir vīns nu tuoļuokūs nūvodu Latvejis Boltkrīvejis pīrūbežā. Tī apsaverami Daugovys lūki, taiseita Viestura Kairiša kina „Piļsāta pi upis”, tī svietej ogūrču svātkus i napaseņ izcalts sātmaļs iz rūbeža ar sābru vaļsti. Taipat nūvodu par pyrmū regionalū gasteišonu izalaseja vaļsts prezidents Edgars Rinkēvičs.

Piec pādejuos administrativi teritorialuos reformys tymā niu apvīnuotys divejis piļsātys i 24 pogosti nu bejušūs Kruoslovys, Dagdys i pa daļai ari Aglyunys nūvodu. Ite dzeivoj vaira nakai 23 tyukstūšys cylvāku ar vysā kruosainu nacionalū sastuovu. Kruoslavīši nav cīši piļsūniski aktivi, par pīmāru, 2021. gods pošvaļdeibu vieliešonuos nūbolsuoja viņ 33 % nu bolstīseigūs – tys ir tik 5800 cylvāku.Turpynojūt rubriku „Kas nūteik munā sātā?”, itūreiz ap Kruoslovys nūvoda atteisteibu i izaicynuojumim kūpumā runojam ar ituos pusis dzeivuotuojim i vītejuos varys puorstuovim.

Sarunā pīsadola: Kruoslovys nūvoda dūmis prīšksādātuojs Gunārs Upenieks (Latvejis Zemnīku savīneiba), zemnīku saimisteibys „Alas” eipašnīks, Kruoslovys dūmis deputats Dmitrijs Zalbovičs (īvālāts nu partejis „Konservatīvī”), Kruoslovys šyušonys uzjāmuma „IV plus” vadeituoja Irēna Voicehoviča, Kruoslovys Varaveiksnys vydsškolys sporta školuotuojs, Latvejis paralimpiskais vīglatlets Dmitrijs Silovs, Laimis muzeja Indrā vadeituoja Ilona Kangizere i zyrgu sātys „Klajumi” saimineica Ilze Stabulniece.