Amerika Birləşmiş Ştatları Beynəlxalq İnkişaf Agentliyi* Azərbaycanda “İcma əlaqələri” layihəsini elan edib Amerika Birləşmiş Ştatları (ABŞ) Beynəlxalq İnkişaf Agentliyi Azərbaycanda “İcma əlaqələri” layihəsini elan edib. Bu ölkənin Azərbaycandakı səfirinin müavini Ceyson Haylond bildirib ki, yeni layihənin məqsədi dövlət və özəl qurumların əməkdaşlarına təlim keçmək, onların ABŞ-a səfərlərini təşkil etmək, həmçinin bu iki ölkə arasında əlaqələri gücləndirməkdir. Onun sözlərinə görə, tibb, təhsil, din, mədəniyyət, kənd təsərrüfatı və başqa sahələr üzrə seçiləcək mütəxəssislər üç həftə müddətində ABŞ-da öz həmkarlarının təcrübəsi ilə tanış olacaq və işgüzar əlaqələr yarada biləcəklər. Proqramın 5 ilə həyata keçirilməsi nəzərdə tutulur. Layihənin icraçısı ABŞ-ın Proyekt Harmoniya təşkilatı olacaq. “İcma əlaqələri” proqramının direktoru Kerri Kasper bildirib ki, layihə çərçivəsində Azərbaycanın 7 icması ABŞ-a səfər edəcək. Hər icma üzrə Azərbaycanın müəyyən edilmiş rayonlarından nümayəndələr seçiləcək. ABŞ-a səfər edən icma nümayəndələri ailələrdə yaşayacaq.*Amerika Birləşmiş Ştatları (ABŞ) Beynəlxalq İnkişaf Agentliyi-US Agency for International Development (USAID)