Vīns nu drūšeibys vaicuojumim, kas eipaši byutisks pīrūbežā i Latgolā ir sabīdreibys uzteiceiba tīsu varai.Pādejā laikā tīsu sistemā īvīš lobuojumus i runoj par dorba efektivizaceju. Kai procesi vyrzās, jemūt vārā ituos dīnys realitati i izaicynuojumus vaļsts drūšeibys aspektūs i asūšajā geopolitiskajā situacejā, cik itei uzticeiba tīsu varai nūsastyprynoj, kai vaļsts drūšeibys vaicuojumi niu mainejuši dorbu tīsā, runojam ar Tīslītu padūmis i Augstuokuos tīsys prīšksādātuoju Aigaru Strupišu.

“Latgolai ir divi izaicynuojumi - cylvāku aizplyusšona nu laukim iz piļsātu, i ūtrys - tys, ka blokom ir agresorvaļsts Krīveja i Boltkrīveja. Ari cylvāku nacionalais sastuovs - Latgolā ir mozuoka daļa latvīšu nakai cytur Latvejā, bet vīna nu Kremļa politikys idejom ir aizstuovēt krīviski runojūšūs cytuos vaļstīs, tys roda lelus riskus tīši Latgolys kontekstā.”

Aigars Strupišs ir nu Latgolys, nu Viļānu, par Tīslītu padūmis i Augstuokuos tīsys prīšksādātuoju jū Saeima ar gona vīnpruoteigu bolsuojumu īcēle 2020. goda vosorā.

“Lykumi ir lobi, lykumūs nav vaine, vaine ir cylvākūs,”

runuodams par vardarbeibys mazynuošonu Aigars Strupišs kai problemu nūruoda darbinīku tryukumu policejā. “Par pīmāru, policejā tryukst 40% policistu, lai ceineitūs pret vardarbeibu, vajag patruļdīnestu, kas apsekuotu tuos giminis, bet kai var nūdrūšynuot drūšeibu, ja pusis policistu nav. Tys ir lels caurums myusu sistemā.” Aigars Strupišs nūruoda - cylvāki, kūpumā sabīdreibā, vardarbeibu nauztver kai lelu problemu. Ir ES pietejumi, kas paruoda, ja cytur Eirūpā vardarbeibu giminē par napījemamu uzskota 80%, tod Latvejā tī ir tikai 40–50%. “Problema nav lykumā, bet policistu i izmaklātuoju izpratnē par vardarbeibu.”Jis atzeist, ka tys, ka socialajūs teiklūs, masu medejūs aizviņ vaira cylvāki runoj par vardarbeibu, par lītom i vaicuojumim, kas jim napateik arī tīsu sistemā, nūruoda iz sabīdreibys izaugsmi. “Ir labi, ka sabīdreibai ir reakceja, tys ruoda, ka sabīdreiba dūmoj i atsateista.”